ДЕРБІСЕКТЕГІ АУЫЗ СУ МӘСЕЛЕСІ: МЕМЛЕКЕТ МҮДДЕСІ МЕН ХАЛЫҚ ҚАЖЕТТІЛІГІ БІРІНШІ ОРЫНДА
Сарыағаш ауданына қарасты Дербісек елді мекеніндегі «ТП-32» ауыз су ұңғымасына байланысты мәселе бүгінде заң аясында қаралып, Түркістан облысы әкімдігінің тұрақты бақылауында тұр. Халықты сапалы ауыз сумен үздіксіз қамтамасыз ету – мемлекеттің басым міндеттерінің бірі болғандықтан, аталған мәселеге қатысты барлық шешімдер қолданыстағы заңнама талаптарына сәйкес қабылдануда.
Аталған су нысаны ұзақ жылдар бойы «Рауан» ЖШС-нің пайдалануында болған. Алайда 2026 жылғы 25 сәуірде жалға алу мерзімінің аяқталуына байланысты мәселе сот тәртібімен қаралып, нәтижесінде серіктестіктің жер учаскесіне қатысты құқық белгілейтін құжаттарының күші жойылды. Сонымен қатар, «Арал-Сырдария» бассейндік инспекциясы санитарлық қорғау аймағына қойылатын талаптардың сақталмауына байланысты су ресурстарын пайдалану құқығын ұзарту жөніндегі өтінішті қанағаттандырудан бас тартқан.
Бұл туралы Түркістан өңірлік коммуникациялар қызметінің көшпелі брифингі барысында Сарыағаш ауданының әкімі Арман Абдуллаев мәлімдеді. Ашық форматта өткен кездесуге бұқаралық ақпарат құралдарының өкілдері мен Дербісек ауылының тұрғындары қатысып, өздерін алаңдатқан сауалдарын тікелей қойды.
Аудан әкімінің айтуынша, Мемлекет басшысы Қасым-Жомарт Тоқаевтың 2022 жылғы Қазақстан халқына Жолдауында елді мекендерді сапалы ауыз сумен толық қамтамасыз ету міндеті нақты жүктелген. Осы тапсырма аясында бүгінде Дербісек ауылындағы ауыз су жүйесі тұрақты әрі штаттық режимде жұмыс істеп тұр.
Қазіргі таңда 18 мыңға жуық тұрғыны бар елді мекенде 3 мыңнан астам абонент орталықтандырылған ауыз су жүйесіне қосылған. Халыққа қызмет көрсетуді «Сарыағаш Тұрмыс» коммуналдық кәсіпорны жүзеге асыруда. Тұрғындарды сумен қамту гидранттық жүйе арқылы үздіксіз жүргізіліп келеді.
Су тапшылығының алдын алу және жүйенің тұрақтылығын сақтау мақсатында қосымша ресурс ретінде «№2-ТП» ұңғымасы да пайдаланылуда. Мамандардың мәліметінше, қазіргі қолданыстағы су қоры тұрғындардың да, кәсіпкерлік нысандардың да қажеттілігін толық өтеуге жеткілікті.
Мемлекеттік органдардың мәлімдеуінше, «ТП-32» ұңғымасы мемлекет меншігіне қайтарылған жағдайда да тұрғындардың ауыз суға қолжетімділігіне ешқандай қауіп төнбейді. Керісінше, стратегиялық маңызы бар су нысандарының мемлекеттік бақылауда болуы халықтың мүддесін қорғауға, ауыз судың тұрақты әрі әділ бөлінуіне мүмкіндік береді. Бұл әсіресе тұрғындар саны өсіп келе жатқан ауылдар үшін аса маңызды.
Су нысандары мемлекет қарамағында болған кезде олардың санитарлық талаптарға сәйкестігі, экологиялық қауіпсіздігі, техникалық жағдайы және халыққа үздіксіз қызмет көрсетуі тұрақты бақылауда болады. Сонымен қатар, мұндай нысандар жеке мүддеден бұрын қоғамдық қажеттілікке қызмет етеді. Бұл өз кезегінде тұрғындардың ауыз сусыз қалмауына, әлеуметтік тұрақтылықтың сақталуына және коммуналдық жүйенің ашық әрі заңды жұмыс істеуіне оң әсерін тигізеді.
Облыс әкімдігі тарапынан да барлық шешімдердің тек заң талаптарына сәйкес қабылданатыны және ешбір тараптың құқықтары шектелмейтіні атап өтілуде. Су ресурстарын пайдалану мәселелері сот шешімдері мен уәкілетті органдардың қорытындылары негізінде ғана реттеледі. Ал «Рауан» ЖШС-не қажетті су көлемі қолданыстағы заңнамаға сәйкес белгіленген тәртіппен беріліп отырады.
Айта кету керек, осы мәселеге байланысты Сарыағаш ауданының әкімі Арман Абдуллаев 2026 жылдың 5 мамырында Түркістан өңірлік коммуникациялар қызметінде арнайы баспасөз мәслихатын өткізіп, көтерілген жайттарға жан-жақты түсініктеме берген болатын. Баспасөз мәслихатында аудан әкімі ауыз сумен қамту жұмыстарының тұрақты бақылауда екенін және барлық шешімдердің заң аясында қабылданатынын ерекше атап өтті.
Сондай-ақ әлеуметтік желілерде облыс және аудан әкімдерінің атына қатысты тарап жатқан кейбір ақпараттардың шындыққа сәйкес келмейтіні ескертілді. Осыған байланысты тұрғындарға тек ресми ақпарат көздеріне сену ұсынылады. Ал сот шешімдеріне қатысты келіспеушіліктер мен шағымдар заң талаптарына сәйкес жоғары сот сатыларында қаралатыны мәлімделді.
Бүгінде Дербісектегі ауыз су мәселесі тек бір нысанның тағдыры ғана емес, халықтың өмір сапасы мен әлеуметтік қауіпсіздігіне тікелей қатысты маңызды мәселе ретінде қарастырылып отыр. Сондықтан мемлекет тарапынан қабылданып жатқан шаралардың негізгі мақсаты – тұрғындарды сапалы ауыз сумен тұрақты қамтамасыз ету, заңдылықты сақтау және стратегиялық маңызы бар су ресурстарын халық игілігіне тиімді пайдалану.
