АРЫСТА ІРІ ХАЛЫҚАРАЛЫҚ ЖОБА ЖҮЗЕГЕ АСУДА

Түркістан облысының Арыс қаласында әлемдік теміржол машина жасау саласындағы жетекші компаниялардың бірі – француздық Alstom компаниясының электровоздарға арналған заманауи сервистік депосының құрылысы қарқынды жүргізілуде. Ауқымды инвестициялық жоба өңірдің өндірістік және логистикалық әлеуетін арттырып қана қоймай, Қазақстанның теміржол инфрақұрылымын жаңғыртуға бағытталған маңызды бастамалардың біріне айналмақ.

Осыған байланысты Арыс қаласында халықаралық серіктестер, салалық мекемелер және бұқаралық ақпарат құралдарының өкілдері үшін арнайы таныстыру сапары ұйымдастырылды. Іс-шара барысында қатысушыларға салынып жатқан жаңа сервистік орталықтың құрылыс кезеңдері, болашақ өндірістік мүмкіндіктері мен енгізілетін технологиялық шешімдер таныстырылды.

Таныстыру іс-шарасына Түркістан облысы әкімінің орынбасары Ертай Алтаев, Франция Республикасының Қазақстан Республикасындағы Төтенше және Өкілетті Елшісі Жоғары Мәртебелі Сильван Гиоге, Alstom компаниясының Батыс және Орталық Азия бойынша басқарушы директоры Жером Бойе, Арыс қаласының әкімі Қайсар Маңқараев, сондай-ақ «Қазақстан темір жолы» ұлттық компаниясының және теміржол саласындағы бірқатар мекемелердің басшылары мен мамандары қатысты.

Жиын барысында Түркістан облысы әкімінің орынбасары Ертай Алтаев жобаның аймақ үшін стратегиялық маңызына ерекше тоқталды.

Ертай Алтаев: 

– Бұл жоба – Арыс қаласының өндірістік әлеуетін арттырып қана қоймай, өңіріміздің жаңа даму кезеңіне жол ашатын маңызды бастама. Халықаралық серіктестермен бірлескен мұндай жобалар – қала экономикасын әртараптандырудың нақты көрінісі. Ең бастысы, бұл бастама жергілікті тұрғындар үшін жаңа жұмыс орындарын ашуға мүмкіндік береді және жас мамандардың кәсіби дамуына жол ашады, – деді.

Өз кезегінде Франция Республикасының Қазақстандағы Төтенше және Өкілетті Елшісі Сильван Гиоге Қазақстан мен Франция арасындағы экономикалық және индустриялық ынтымақтастықтың қарқынды дамып келе жатқанын атап өтті.

Сильван Гиоге: 

– Қазақстан мен Франция арасындағы ынтымақтастық жыл сайын жаңа деңгейге көтеріліп келеді. Соның айқын дәлелі – Alstom компаниясының Қазақстанда жүзеге асырып жатқан жобалары. Арыс қаласындағы бұл сервистік депо екі ел арасындағы сенім мен ұзақ мерзімді серіктестіктің нақты көрінісі болып табылады. Мұндай жобалар тек экономикаға ғана емес, өңірлік дамуға да үлкен серпін береді, – деді.

Салтанатты шара аясында жобаның табысты іске асырылып жатқанын білдіретін ескерткіш тақтаның ресми ашылу рәсімі өтті. Қатысушылар құрылыс алаңын аралап, нысанның техникалық ерекшеліктерімен және алдағы жұмыс жоспарымен танысты.

Жоба Alstom компаниясы мен Қазақстан Республикасы Үкіметі арасында жасалған инвестициялық келісім негізінде жүзеге асырылуда. Арыс қаласындағы сервистік депо еліміз аумағында салынатын төрт ірі техникалық қызмет көрсету орталығының бірі болмақ. Жоба толық іске қосылғаннан кейін нысан электровоздарға техникалық қызмет көрсету, күрделі жөндеу және диагностикалық жұмыстар жүргізетін өңірдегі негізгі өндірістік орталықтардың біріне айналады.

Жаңа депо ай сайын 120 локомотив секциясына дейін қызмет көрсетуге қауқарлы болады. Жылдық көрсеткіш шамамен 1440 секцияға дейін жетеді деп жоспарланып отыр. Бұл теміржол техникасының сенімділігін арттырып, жүк және жолаушылар тасымалының қауіпсіздігін күшейтуге мүмкіндік береді.

Сала мамандарының айтуынша, жобаның жүзеге асуы локомотивтердің техникалық дайындығын жақсартып қана қоймай, ішкі және халықаралық теміржол бағыттарындағы тасымал тиімділігін арттыруға ықпал етеді. Сонымен бірге сервистік қызмет көрсету уақыты қысқарып, жөндеу сапасы халықаралық стандарттарға сәйкестендірілмек.

Арыс қаласының географиялық орналасуы да жоба маңызын арттыра түседі. Қала Орта дәліз бойындағы маңызды теміржол тораптарының бірі ретінде Еуропа мен Азияны байланыстыратын транзиттік бағытта орналасқан. Осы артықшылықтың нәтижесінде жаңа депо өңірлік сервистік хабқа айналып, Қазақстанның транзиттік әлеуетін күшейтуге үлес қосады.

Жоба аясында еліміз бойынша өңірлік сервистік қызмет көрсету орталықтарын дамытуға бағытталған жалпы көлемі 50 миллион еуроны құрайтын инвестициялық бағдарлама жүзеге асырылып жатыр. Нәтижесінде республика көлемінде 700-ге жуық жаңа жұмыс орны ашылады деп күтілуде. Бұл өз кезегінде техникалық мамандар даярлау ісіне серпін беріп, жастардың өндірістік салаға қызығушылығын арттыруға ықпал етеді.

Соңғы жылдары Қазақстанда теміржол саласын жаңғыртуға ерекше көңіл бөлінуде. Ел аумағында жаңа вокзалдар салынып, бірқатар теміржол бекеттері күрделі жөндеуден өткізілуде. Сонымен қатар, заманауи жолаушылар вагондары жаңартылып, теміржол инфрақұрылымын цифрландыру бағытындағы жұмыстар күшейтілді. Бұл шаралар көлік логистикасының тиімділігін арттырып, халықаралық транзиттік дәліздердегі Қазақстанның рөлін нығайтуға бағытталған.

Арыс қаласындағы жаңа сервистік депо – осы жүйелі реформалардың нақты жалғасы. Халықаралық тәжірибе мен озық технологияны енгізуге негізделген бұл жоба Түркістан облысының индустриялық дамуына тың серпін беріп, еліміздің көлік-логистика саласындағы әлеуетін жаңа деңгейге көтеруге мүмкіндік жасайды.