ЕКІНШІ ТЯНЬ-ШАНЬ ФОРУМЫНДА ТҮРКІСТАН ОБЛЫСЫ МАҢЫЗДЫ КЕЛІСІМГЕ ҚОЛ ЖЕТКІЗДІ

Алматы қаласында Орталық Азиядағы экономикалық ынтымақтастық жөніндегі екінші Тянь-Шань форумы өтуде. Жиын аясында Түркістан облысының әкімдігі мен «Шыңжаң Лихуа» инвестициялық холдингі арасында өңірде мақта кластерінің екінші кезеңін жүзеге асыру туралы меморандумға қол қойылды. Құжатқа облыс атынан өңір басшысы Нұралхан Көшеров, ал инвестор тарапынан «Шыңжаң Лихуа» инвестициялық холдингінің директоры Сюй Цзе қол қойды.

Аталған меморандум «Орталық Азия – Қытай» екінші саммиті шеңберінде ауыл шаруашылығы саласы бойынша қол жеткізілген келісімдерді орындауға, сондай-ақ Қазақстан мен Қытай арасындағы аграрлық әріптестікті нығайтуға бағытталған. Тараптар бірлескен жұмысты теңдік, еріктілік, өзара тиімділік, ұзақ мерзімді тұрақтылық және экологиялық жауапкершілік ұстанымдарына сүйене отырып жүргізуге уағдаласты.

Айта кетейік, мақта кластері жобасының алғашқы кезеңінде тараптар өзара тиімді серіктестік орнатты. 2026 жылғы шілде айының соңында инвестор бірінші кезең бойынша құрылыс жұмыстарын толығымен аяқтады. Соның нәтижесінде Түркістан облысында заманауи мақта өсіру базасы қалыптасты.

Бұдан бөлек, мақта өңдеу, поливинилхлорид құбырларын шығару, су үнемдеу жабдықтарын өндіру және тұқым өңдеу бағыттарын қамтитын төрт өндірістік әрі қосалқы нысанды тұрғызып, іске қосу көзделген.

Кластердің екінші кезеңінде инвестор аймақтағы қаржы салымдарының көлемін арттырып, мақта өндірісінің толық технологиялық тізбегін қалыптастыруды жоспарлап отыр. Жобаға қажетті қаражат инвестордың жеке қаражаты есебінен қамтамасыз етіледі.

Келесі кезеңде өңірде озық технологияларға негізделген мақта өсіру базасын құру көзделген. Жоба шеңберінде ақылды егіншілік жүйесі, тамшылатып суару, су ресурстарын үнемдейтін технологиялар мен қоршаған ортаға зияны аз өндіріс әдістері кеңінен қолданысқа енгізіледі. Бұл сапалы мақта көлемін көбейтіп, саладағы технологиялық және экологиялық талаптарды жаңа деңгейге көтеруге жол ашады.

Сонымен қатар шикізатты терең өңдеу саласын өркендетуге басымдық беріледі. Атап айтқанда, жоғары сапалы әрі экологиялық таза мата тоқу, үй тоқыма өнімдерін шығару, бояу-әрлеу жұмыстарын жүргізу және дайын киім өндіретін кәсіпорындарды іске қосу жоспарланып отыр.

Осылайша, жобаның екінші кезеңі мақта өсіруден бастап, оны иіру, мата тоқу, бояу-әрлеу және дайын киім шығаруға дейінгі барлық технологиялық үдерісті қамтитын тұтас өндірістік жүйені қалыптастыруды мақсат етеді.

Инвестициялық бастаманың жүзеге асуы өңірдің өнеркәсіптік мүмкіндіктерін кеңейтуге, мақта шаруашылығының бағыттарын әртараптандыруға, шикізатты терең өңдеу көлемін арттыруға және ресурстарды ұтымды пайдаланатын заманауи өндіріс орындарын дамытуға серпін береді. Сондай-ақ Қазақстан мен Қытай арасындағы трансшекаралық аграрлық-өнеркәсіптік байланыстардың нығаюына ықпал етеді.

Инвестор екінші кезең бойынша жобалық әзірлік жұмыстарын жүргізіп, қажетті рұқсат құжаттарын рәсімдегеннен кейін құрылысқа 2027 жылы кірісуді жоспарлап отыр. Құрылыс жұмыстарының ұзақтығы – екі жыл.

Тараптар жобаны бекітілген кестеге сәйкес аяқтап, өндірістік нысандарды қолданысқа беруге және инвестициялық бастаманың экономикалық нәтижелілігін қамтамасыз етуге ниетті.