ТҮРКІСТАНДАҒЫ ЖЫР ДОДАСЫ:ИРАНҒАЙЫП КҮЗЕНБАЕВ БАС ЖҮЛДЕНІ ИЕЛЕНДІ
Киелі Түркістан төрінде Ұлыстың ұлы күні – республикалық ақындар айтысы өтті. Дүбірлі дода белгілі айтыскер ақын, «Алтын домбыра» иегері Бекарыс Шойбековтің 50 жас мерейтойына арналды.
«Айтыстың алтын айдары — Бекарыс» атты бұл шарада елге танымал 14 сөз шебері бақ сынады. Олардың қатарында Мұхтар Ниязов, Жансая Мусина, Еркебұлан Қайназаров сынды айтыс ақтаңгерлері бар.
Мерейтой иесіне құрмет
Түркістан облысының әкімі Нұралхан Көшеровтің атынан мерейтой иесі Бекарыс Шойбековке ерекше құрмет көрсетіліп, иығына шапан жабылды және су жаңа автокөлік кілті табысталды.
Аламан айтыстың қорытындысы
Қазылар алқасының шешімімен жеңімпаздар келесідей анықталды:
Бас жүлде: Иранғайып Күзенбаев (Астана қаласы);
ІІ орын: Даурен Ақсақалов (Түркістан) және Жансая Мусина (БҚО);
ІІІ орын: Мұхтар Ниязов пен Мейірбек Сұлтанхан (Қызылорда облысы).
«Бұл айтыс — тек сөз жарысы емес, ұлттық құндылықтар мен ел бірлігін ұлықтаған рухани кеш болды,» – деп атап өтті ұйымдастырушылар.
Айта кетейік, қазақтың төл өнерінің додасы Түркістан қаласы әкімдігінің ұйымдастыруымен және «Amanat» партиясының қолдауымен жүзеге асты.
