БАУЫРДЫ ГЕПАТИТТЕН САҚТАҢЫЗ

Гепатит – бұл бауырдың қабынуымен сипатталатын ауру. Бауыр – ағзадағы ең маңызды мүшелердің бірі, ол ас қорытуға қатысып, зиянды заттарды сүзгіден өткізеді, ағзаға қажетті белоктар мен ферменттерді түзеді. Сондықтан бауырдың зақымдануы бүкіл ағзаның жұмысына әсер етеді.

Гепатиттің пайда болуына әртүрлі факторлар әсер етеді. Оның ішінде ең кең таралғаны – вирустық гепатиттер (А, В, С, D, Е). Бұдан бөлек, алкогольді шамадан тыс пайдалану, кейбір дәрі-дәрмектерді ұзақ қолдану, улану және иммундық жүйенің бұзылуы да бауырды зақымдап, гепатитке әкелуі мүмкін.

Аурудың негізгі белгілеріне әлсіздік, тәбеттің төмендеуі, жүрек айну, сарғаю (көздің және терінің сарғаюы), несептің қоюлануы және бауырдың үлкеюі жатады. Кейде гепатит ұзақ уақыт бойы білінбей, тек созылмалы кезеңде анықталуы мүмкін.

Алдын алу шаралары

Гепатиттің алдын алу үшін бірнеше қарапайым, бірақ маңызды ережелерді сақтау қажет:

1. Жеке гигиена – қолды жиі жуу, таза және қайнатылған суды пайдалану. Бұл әсіресе А және Е гепатиттерінен сақтайды.

2. Вакцинация – А және В гепатитіне қарсы екпе бар. Ол аурудың алдын алуда ең тиімді тәсілдердің бірі болып табылады.

3. Қауіпсіз медициналық шаралар – қан құю кезінде тексерілген донор қаны қолданылуы керек, медициналық құралдардың стерильді болуына назар аудару қажет.

4. Жыныстық қатынаста сақтану – В және С гепатиттері жыныстық жолмен жұғуы мүмкін, сондықтан қорғаныш құралдарын пайдалану маңызды.

5. Зиянды әдеттерден бас тарту – ортақ инелерді қолданбау, есірткіден аулақ болу, алкогольді шектен тыс тұтынбау.

6. Салауатты өмір салты – дұрыс тамақтану, спортпен шұғылдану және бауырға ауырлық түсіретін дәрілерден бас тарту.

Қорытынды

Гепатит – қауіпті аурулардың бірі, бірақ оны ерте анықтап, алдын алу шараларын дұрыс ұйымдастырса, одан сақтануға болады. Әр адам жеке гигиенаны сақтап, дұрыс тамақтанып, вакцинациядан өтсе, бауыр саулығын ұзақ жылдар бойы қорғауға мүмкіндік бар.