СУДЫ ҮНЕМДЕУГЕ АРНАЛҒАН ЖОБА ІСКЕ ҚОСЫЛАДЫ
Мемлекет басшысы Қасым-Жомарт Тоқаев БҰҰ-ның Дүниежүзілік метеорология ұйымы президенті, сондай-ақ БАӘ Ұлттық метеорология орталығы бас директоры Абдулла Әл-Мандусты қабылдады.
Кездесу барысында Мемлекет басшысы Дүниежүзілік метеорология ұйымының климаттың өзгеруі, ауа райын болжау, су ресурстарын тиімді басқару және табиғи апаттардың қаупін азайту бағытындағы халықаралық ынтымақтастықты нығайтуда ерекше рөл атқаратынын атап өтті. Президент қазіргі кезеңде климаттық өзгерістердің салдары бүкіл әлем үшін күрделі сын-қатерге айналғанын айтып, ерте ескерту жүйелерін дамыту, метеорологиялық инфрақұрылымды жаңғырту және ғылыми деректермен алмасу Қазақстан үшін стратегиялық маңызға ие екенін жеткізді.
Қасым-Жомарт Тоқаев Қазақстанның Біріккен Араб Әмірліктерімен метеорология және климаттық технологиялар саласындағы ынтымақтастықты кеңейтуге дайын екенін растады. Мемлекет басшысы БАӘ-нің ауа райын басқару және бұлттарды тұқымдандыру технологияларын дамытудағы озық тәжірибесіне жоғары баға берді. Аталған технология атмосферадағы қолайлы бұлттарға арнайы реагенттерді енгізу арқылы жауын-шашынның түсу ықтималдығын арттыруға мүмкіндік береді. Бұл әдіс әлемнің қуаң климатты елдерінде су қорын молайту және ауыл шаруашылығын қолдау мақсатында кеңінен қолданылып келеді.
Кездесуде өңірлік және жаһандық деңгейдегі су қауіпсіздігі мен су ресурстарын басқару мәселелері де жан-жақты қарастырылды. Президент су тапшылығының халықаралық деңгейдегі өзекті мәселеге айналып отырғанын атап өтіп, Қазақстанның БҰҰ аясында Халықаралық су ұйымын құру жөніндегі бастамасының маңыздылығына тоқталды. Бұл бастама трансшекаралық өзендерді тиімді пайдалану, су ресурстарын әділ бөлу және мемлекеттер арасындағы ынтымақтастықты нығайтуға бағытталған.
Сонымен қатар Түркістан облысы мен БАӘ Ұлттық метеорология орталығының бірлескен жобасы аясында су қоймаларын толықтыру және ауыл шаруашылығы жерлерін сумен қамтамасыз ету мақсатында жауын-шашынды жасанды жолмен шақыру технологиясын енгізу мәселесі талқыланды. Аталған жоба 17 мамырда іске қосылады. Жоба шеңберінде атмосферадағы ылғалдылық пен бұлттардың физикалық қасиеттері зерттеліп, қолайлы метеорологиялық жағдай қалыптасқан кезде арнайы реагенттер қолдану арқылы жауын-шашынның түсу ықтималдығы арттырылады.
Бұл бастама су тапшылығы өткір сезілетін Түркістан облысы үшін ерекше маңызға ие. Жасанды жаңбыр технологиясы су қоймаларының қорын көбейтуге, егіс алқаптарын тұрақты сумен қамтамасыз етуге және ауыл шаруашылығы өнімділігін арттыруға мүмкіндік береді деп күтілуде. Сонымен қатар бұл жоба климаттың өзгеруіне бейімделудің заманауи әрі тиімді тетіктерінің бірі ретінде қарастырылады.
Осылайша, Қазақстан өңірде жасанды жаңбыр технологиясын қолдануды қолға алған алғашқы елдердің бірі болмақ. Бұл еліміздің ғылым мен инновацияға негізделген шешімдерді кеңінен енгізуге, халықаралық серіктестікті дамытуға және климаттық тәуекелдерге заманауи технологиялар арқылы жауап беруге ұмтылысын көрсетеді. Егер жоба сәтті жүзеге асса, мұндай тәжірибені болашақта су тапшылығы байқалатын басқа өңірлерде де қолдану мүмкіндігі қарастырылады.
